Vanila Ice-cream with Chocolate Sauce - વેનીલા આઈસક્રીમ વીથ ચોકલેટ સોસ

Ingredients - સામગ્રી
1 લિટર દૂધ
12 ટેબલસ્પૂન ખાંડ
1-2 ટીસ્પૂન જી.એમ.એસ. પાઉડર
1-2 ટીસ્પૂન સી.એમ.સી. પાઉડર
2 ટીસ્પૂન કોર્નફ્લોર
200 ગ્રામ ક્રીમ
8 થી 10 કાજુ
પીન્ક લિક્વિડ કલર, વેનીલા એસેન્સ

Method - રીત
એક વાસણમાં દૂધ ઉકળવા મૂકવું. થોડા ઠંડા દૂધમાં જી.એમ.એસ. પાઉડર સી.એમ.સી. પાઉડર અને કોર્નફ્લોર મિક્સ કરી, ઉકળતા દૂધમાં નાંખવું. પછી ખાંડ નાંખી, દૂધ જાડું થાય એટલે ઉતારી લેવું. ઠંડું પડે એટલે ક્રીમ, ગુલાબી કલર અને વેનિલા એસેન્સ નાખી, મિક્સરમાં એકરસ કરી, એલ્યુમિનિયમના ડબ્બામાં ભરી, રેફ્રિજરેટરમાં મૂકવું જામી જાય એટલે ફરી મિક્સરમાં ચર્ન કરવું. જેથી બરફની કણી ભાંગી જાય. ફરી એલ્યુમિનિયમના ડબ્બામાં ભરી કાજુના કટકાથી સજાવટ કરી ફ્રિઝરમાં સેટ થવા આઈસક્રીમ મૂકવો. બરાબર જામી જાય એટલે કાઢી, સ્લાઈસ કાપી, ઉપર ચોકલેટ સોસ રેડી પીરસવો.

Tripal Sunday - ટ્રીપલ સન્ડે

Ingredients - સામગ્રી
3 કેકની પાતળી સ્લાઈસ
1 કપ કેસર-પિસ્તા આઈસક્રીમ (વા.નં.1 પ્રમાણે)
1 કપ ચોકલેટ આઈસ્કીમ (વા.નં.3 પ્રમાણે)
1 કપ રોઝ આઈસ્ક્રીમ (વા.નં.2ની રીત પ્રમાણે)
1/2 કપ દૂધ
1 ટેબલસ્પૂન ખાંડ
3 ટેબલસ્પૂન છોલેલી બદામની કતરી
2 ટેબલસ્પૂન પિસ્તાની કાતરી
2 ટેબલસ્પૂન ચારોળી
1/4 ટીસ્પૂન કેસરની ભૂકી

Method - રીત
કેસર-પિસ્તા આઈસ્ક્રીમ, ચોકટેલ આઈસ્ક્રીમ અને રોઝ આઈસ્ક્રીમ ત્રણે આઈસક્રીમ જુદા જુદા વાસણમાં જમાવવા – એક એલ્યુમિનિયમના ડબ્બામાં કેકની પાતળી સ્લાઈસ પાથરવી. દૂધમાં ખાંડ અને કેસર નાંખી ઉકાળવું. ઠંડુ પડે એટલે કેકની સ્લાઈસ ઉપર રેડી દેવું. પછી ડબ્બો રેફ્રિજરેટરમાં મૂકવો. થોડી વાર પછી કાઢી તેના ઉપર કેસર-પિસ્તાનો આઈસક્રીમ ભરી, ડીપ ફ્રિઝરમાં ડબ્બો મૂકવો. બરાબર જામી જાય એટલે તેના ઉપર થોડા ડ્રાયફ્રુટ્સ ભભરાવી ચોકલેટનો અાઈસક્રીમ પાથરવો. ફરી ડીપ ફ્રિઝરમાં મૂકી ચોકલેટનો આઈસક્રીમ જામી જાય એટલે તેના ઉપર રોઝ અાઈસક્રીમ પાથરી, ઉપર બદામ-પિસ્તાની કતરી અને ચારોળી ભભરાવી ડીપ ફ્રીઝરમાં મૂકવો. બરાબર જામી જાય એટલે કાઢી, છેક નીચે સુધી કાપો પાડી, સ્લાઈસ કાપી ડિશમાં આઈસક્રીમ મૂકી સર્વ કરવો.નોંધ – કેરી, ચીકુ, લીલી દ્રાક્ષ વગેરે લીલાં ફ્રુટ્સ પણ આઈસક્રીમની વચ્ચે મૂકી શકાય.

Rose Icecream - રોઝ આઈસક્રીમ

Ingredients - સામગ્રી
1 લિટર દૂધ
3 ટેબલસ્પૂન અમૂલ સ્પે મિલ્ક પાઉડર
1 ટેબલસ્પૂન કસ્ટર્ડ પાઉડર
250 ગ્રામ ખાંડ
200 ગ્રામ ક્રીમ
નંગ-5 કાજુ, 5 બદામ
પિન્ક કલર, રોઝ એસેન્સ

Method - રીત
એક વાસણમાં દૂધ ઊકળવા મૂકવું. થોડા ઠંડા દૂધમાં કસ્ટર્ડ પાઉડર મિક્સ કરી તેમાં નાખવો. પછી તેમાં ખાંડ નાખવી. દૂધ જાડું થાય એટલે ઉતારી, ઠંડું પડે એટલે ક્રીમ, મિલ્ક પાઉડર, થોડાક ગુલાબી રંગ અને રોઝ એસેન્સ નાખી, મિક્સરમાં મિક્સ કરવું. પછી એલ્યુમિનિયમના ડબ્બામાં ભરી, રેફ્રિજરેટરના ફ્રિઝરમાં જમાવવા મૂકવો. જામી જાય એટલે કાઢી ફરી મિક્સરમાં એકરસ કરવો. જેથી બરફની કણી ભાંગી જાય. પછી ડબ્બામાં ભરવો. કાજુની કાતરી અને છોલેલી બદામની કાતરીથી સજાવટ કરી ફ્રિઝરમાં મૂકવો બરાબર જામી જાય એટલે કાઢી લેવો.

Pineapple Ice-cream - પાઈનેપલ આઈસક્રીમ

Ingredients - સામગ્રી
500 મિ.લિ. દૂધ
6 ટેબલસ્પૂન ખાંડ
1 ટેબલસ્પન મિલ્ક પાઉડર (વધારે ફેટવાળો)
1 ટેબલસ્પૂન કસ્ટર્ડ પાઉડર –
પાઈનેપલ ફ્લેવરનો
4 સ્લાઈસ પાઈનેપલ
200 ગ્રા ક્રીમ
10 કાજુ, 8 બદામ
4 ટીપાં યલો કલર, પાઈનેપલ એસેન્સ

Method - રીત
દૂધમાં ખાંડ, મિલ્ક પાઉડર અને કસ્ટર્ડ પાઉડર નાંખી ઉકાળવું. જાડું થાય એટલે ઉતારી, ઠંડું પડે એટલે તેમાં બે પાઈનેપલની સ્લાઈસના કટકા, ક્રીમ, યલો કલર અને એસેન્સ નાંખી મિક્સરમાં બીટ કરવું. પછી એલ્યુમિનિયના ડબ્બામાં ભરી, રેફ્રિજરેટરમાં મૂકવું. ઢાંકણ ફિટ રાખવું. સેટ થાય એટલે ફરી મિક્સરમાં બીટ કરવું. પછી તેમાં પાઈનેપલની એક સ્લાઈસના કટકા નાખી હલાવી ડબ્બામાં મિશ્રણ ભરવું. તેના ઉપર એક પાઈનેપલ સ્લાઈસના કટકા, છોલેલી બદામની કાતરી અને કાજુની કાતરીથી સજાવટ કરી, ફ્રિઝરમાં આઈસક્રીમ જમાવવા મૂકવો. બરાબર ઠરી જાય એટલે કાઢી લેવો.

Orange Kulfi - ઓરેન્જ કુલફી

Ingredients - સામગ્રી
1 લિટર દૂધ
1/4 ટીન કન્ડેન્સ્ડ મિલ્ક
2 ટેબલસ્પૂન ખાંડ
2 ટેબલસ્પૂન કોર્નફ્લોર
1 ટેબલસ્પૂન ચારોળીનો ભૂકો
1 ટેબલસ્પૂન કાજુનો ભૂકો
1 કપ ક્રીમ, 2 સંતરાં (મીઠાં)
ઓરેન્જ એસેન્સ, ઓરેન્જ કલર

Method - રીત
એક વાસણમાં દૂધ ઉકળવા મૂકવું. થોડા ઠંડા દૂધમાં કોર્નફ્લોર મિક્સ કરી ઉકળતા દૂધમાં નાંખવો. ખાં નાંખી દૂધ જાડું થાય એટલે ઉતારી લેવું. દૂધ ઠંડું પડે એટલે તેમાં કન્ડેન્સ્ડ મિલ્ક, ક્રીમ, ચારોળીનો ભૂકો, કાજુનો ભૂકો, ઓરેન્જ કલર અને ઓરેન્જ એસેન્સ નાંખી, મિક્સરમાં હલાવી એકરસ કરવું. પછી સંતરાનો ગલ (બરાબર કણી છૂટી પાડી) નાંખી, કુલફીના મોલ્ડમાં ભરી, ફ્રિઝરમાં મૂકવું. કુલફી સેટ થઈ જાય એઠલે કાઢી લેવી.

Leechee Ice-cream -- લીચીનો આઈસક્રીમ

Ingredients - સામગ્રી
2 ડઝન લીચી
1 લિટર દૂધ
1 ટેબલસ્પૂન કસ્ટર્ડ પાઉડર
250 ગ્રામ ખાંડ
4 કપ તાજું ક્રીમ
1 ટેબલસ્પૂન છોલેલી બદામની કાતરી
1 ટેબલસ્પૂન પિસ્તાંની કાતરી
1 ટેબલસ્પૂન કાજુનો ભૂકો
આઈસક્રીમ એસેન્સ, પીળો કલર

Method - રીત
લીચીનો છાલ અને બી કાઢી, મિક્સરમાં મેશ કરી માવો બનાવવો.દૂધને ઉકાળી, થોડા ઠંડા દૂધમાં કસ્ટર્ડ પાઉડર મિક્સ કરી નાખવો. તેમાં ખાંડ નાખી દૂધ જાડું થાય એટલે ઉતારી, ઠંડું પાડવું. ઠંડું થાય એટલે લીચીનો માવો, ક્રીમ, ત્રણ-ચાર ટીપાં પીળો કલર અને એસેન્સ નાખી, એલ્યુમિનિયમના ડબ્બામાં દૂધ નાખી રેફ્રિજરેટરમાં મૂકવું. સેટ થાય એટલે લિક્વિડાઈઝરમાં ચર્ન કરી ડબ્બામાં ભરી, બદામની કાતરી, પિસ્તાંની કાતરી, દ્રાક્ષ અને કાજુનો ભૂકો નાંખી ફરી ફ્રિઝરમાં મૂકવો. આઈસક્રીમ બરાબર જામી જાય એટલે કાઢી લેવો.

Kesar-Almond Kulfi - કેસર-બદામ કુલફી

Ingredients - સામગ્રી
1 લિટર દૂધ
100 ગ્રામ માવો8 ટેબલસ્પૂન કન્ડેન્સ્ડ મિલ્ક
8 ટેબલસ્પૂન ખાંડ
2 ટેબલસ્પૂન મલાઈ
2 ટેબલસ્પૂન છોલેલી બદામની કતરી
2 ટેબલસ્પૂન પિસ્તાની કતરી
1 ટીસ્પૂન એલજીનો ભૂકો
1/2 ટીસ્પૂન કેસરની ભૂકી

Method - રીત
એક વાસણમાં દૂધ ઉકળવા મુકવું. બરાબર ઉકળે અને જાડું થવા આવે એઠલે કન્ડેન્સ્ડ મિલ્ક અને માવાને છૂટો કરીને નાંખવો. ઘટ્ટ થાય એટલે ખાંડ અને કેસરની ભૂકી નાખવા. ખાંડનું પાણી બળે એટલે એલચીનો ભૂકો નાંખવો. બરાબર જામી જાય તેવું થાય એટલે ઉતારી મલાઈ નાંખી બરાબર મિક્સ કરવું. ઠુંડ પડે એટલે કુલપીના મોલ્ડમાં (એલ્યુમિનિયમની કોન આકારની ઢાંકણા વાળી ડબ્બી) ભરી, ઉપર બદામ-પિસ્તાની કતરી નાંખી બંધ કરી ફ્રિઝરમાં મૂકવા. બરાબર સેટ થઈ જાય એટલે મોલ્ડમાંથી કુલફી કાઢી લેવી.
Post a Comment

Kesar Pista Icecream - કેસર-પિસ્તા આઈસક્રીમ

Ingredients - સામગ્રી
1 લિટર દૂધ
250 ગ્રામ ખાંડ
1 ટેબલસ્પૂન કોર્નફ્લોર
1/2 ટીસ્પૂન જી.એમ.એસ. પાઉડર
1/2 ટીસ્પૂન સી.એમ.સી. પાઉડર
1/2 ટીસ્પૂન (નાનો કટકો) ચાયનો ગ્રાસ
200 ગ્રામ તાજું ક્રીમ
25 ગ્રામ પિસ્તાની કતરી
1/2 ટીસ્પૂન કેસરની ભૂકી
4 ટીપાં કેસરનો એસેન્સ

Method - રીત
દૂધમાં ખાંડ, જી.એમ.એસ. પાઉડર, સી.એમ.સી. પાઉડર, કોર્નફ્લોર અને કેસરની ભૂકી નાખી, ગેસ ઉપર મૂકવું. દૂધ જાડું થાય એટલે ઉતારી તરત જ ચાયના ગ્રાસ નાખવું. ઠંડું પડે એઠલે ક્રીમ એલચીનો ભૂકો અને એસેન્સ નાખી મિક્સરમાં એકરસ કરી, તેમાં પિસ્તાની કતરી (થોડી અલગ કાઢી) નાખી, એલ્યુમિનિયમના ડબ્બામાં ભરી, ફ્રિજમાં મૂકવું. અાઈસક્રીમ જામે એટલે કાઢી ફરી મિક્સરમાં બીટ કરવા જેથી બરફીની કણી ભાગી જાય. પછી ડબ્બીમાં ભરી, ઉપર પિસ્તાની કતરી ભભરાવી ફરી ફ્રીજમાં મૂકવો. બરાબર જામી જાય એટલે કાઢી લેવો.નોંધ – જી.એમ.એસ. પાઉડર, સી.એમ.સી. પાઉર અને ચાયના ગ્રાસ નાખવાથી અાઈસક્રીમ ક્રીમી અને ચીકણો થાય છે. બન્ને પાઉડર કેમિસ્ટની દુકાને મળે છે. જી.એમ.એસ. એટલે ગ્લિસરો મોના સ્ટેરાઈટ જે બાઈડિંગ એજન્ટ છે. સી.એમ.સી. એટલે કાર્બોક્સી મિથાઈલ સેલ્યુલોઝ જે સ્મુધિંગ એજન્ટ છે.

Instant Ice-cream - ઈન્સ્ટન્ટ આઈસક્રીમ

Ingredients - સામગ્રી
200 મિ.લિ. દૂધ
1/2 ટીન કન્ડેન્સ્ડ મિલ્ક
2 ટેબલસ્પૂન મિલ્ક પાઉડર
1 ટેબલસ્પૂન કાજુનો ભૂકો
1 ટેબલસ્પૂન બદામનો ભૂકો
1 ટેબલસ્પૂન પિસ્તાંનો ભૂકો
4 ટીપાં ગુલાબી રંગ, રાસબરી એસેન્સ

Method - રીત
દૂધને ગરમ કરી તેમાં કન્ડેન્સ્ડ મિલ્ક બરાબર મિક્સ કરી ડ્રાય ફ્રુટ્સનો ભૂકો મિલ્ક પાઉડર, ગુલાબી રંગ અને રાસબરીનો એસેન્સ નાંખી બરાબર મિક્સ કરી, બદામની કતરી નાંખી એલ્યુમિનિયમના ડબ્બામાં ભરી રેફ્રિજરેટરના ફ્રિઝરમાં મૂકવો. જામી જાય એટલે કાઢી લેવો.

Gul-Bahar Ice-cream - ગુલબહાર આઈસક્રીમ

Ingredients - સામગ્રી
1 લિટર દૂધ
50 ગ્રામ નાળિયેરનું ખમણ
200 ગ્રામ ક્રીમ
1 ટેબલસ્પૂન કોર્નફ્લોર
6 ટેબલસ્પૂન ગુલકંદ અથવા 1 કપ રોઝ સીરપ
બદામ, પિસ્તાં

Method - રીત
એક વાસણમાં દૂધ ઉકળવા મૂકવું. થોડા ઠંડા દૂધમાં કોર્નફ્લોર મિક્સ કરી દૂધમાં નાખવો. જાડું થાય એટલે ઉતારી, ઠંડું થાય એટલે નાળિયેરનું ખમણ, ક્રીમ અને ગુલકંદ અથવા રોઝ સીરપ નાંખી, મિક્સરમાં મિક્સ કરી, એલ્યુમિનિયમના ડબ્બામાં ભરી, ડીપ ફ્રીઝરમાં મૂકવું. જામી જાય એટલે કાઢી ફરી મિક્સરમાં એકરસ કરવું. જેથી બરફની કણી ભાંગી જાય. ફરી ડબ્બામાં ભરી, છોલેલી બદામની કાતરી અને પિસ્તાંની કાતરીથી સજાવટ કરી, ફ્રીઝરમાં મૂકી, સેટ થાય એટલે કાઢી લેવો.નોંધ – ગુલકંદ અને રોઝ સીરપને લીધે ખાંડ નાંખવાની ખાસ જરુર પડતી નથી. જો ગુલકંદ અથવા રોઝ સીપર નાંખવો ન હોય તો તેને બદલે ગુલાબની પાંદડીઓ, ખાંડ અને એસેન્સ નાંખી આઈસક્રીમ બનાવી શકાય.

Flora with Orange Sauce - ઓરેન્જ ફ્લોરા વીથ ઓરેન્સ સોસ

Ingredients - સામગ્રી
1 લિટર દૂધ
250 ગ્રામ ખાંડ
400 ગ્રામ તાજું ક્રીમ
1 ટેબલસ્પૂન અમુલ સ્પે. મિલ્ક પાઉડર
અથવા કોઈપણ હોલ મિલ્ક પાઉડર
1 ટીસ્પૂન ઓરેન્જ કસ્ટર્ડ પાઉડર
નંગ-2 સંતરા (મીઠાં)
ઓરેન્જ કલર, ઓરેન્જ એસેન્સ – પ્રમાણસર
સજાવટ માટે –
1 સંતરું
6 બદામ, 10 પિસ્તાં, 7 કાજુ
ઓરેન્જ સોસ

Method - રીત
એક વાસણમાં દૂધ ઊકળવા મૂકવું. થોડું જાડું થાય એટલે કસ્ટર્ડ પાઉડરને થોડા ઠંડા દૂધમાં મિક્સ કરી નાખવો. પછી ખાંડ નાંખી દૂધ જાડું થાય એટલે ઉતારી લેવું. બરાબર ઠંડું થાય એટલે મિલ્ક પાઉડર, ક્રીમ, સંતરાનો ગલ, ઓરેન્જ એસેન્સ અને ઓરેન્જ કલર થોડો નાંખી, મિક્સરમાં મિક્સ કરવું. પછી એલ્યુમિનિયમના ડબ્બામાં ભરી ફ્રિજમાં મૂકવું. કઠણ થાય એટલે કાઢી ફરી મિક્સરમાં બીટ કરવું. જેથી બરફની કણી ભાંગી જાય, ત્યારબાદ ડબ્બામાં ભરી, ઉપર છોલેલી બદામની કતરી, કાજુની કતરી અને સંતરાના ગલને ફોળી, ઝીણી ઝીણી કણી છૂટી પાડી ઉપર ભભરાવવી. પછી ફરી ફ્રિઝરમાં મૂકવો. બરાબર જામી જાય એટલે કાઢી, ઉપર ઓરેન્જ સોસ રેડી પીરસવો.

Drimland Sande - ડ્રીમલેન્ટ સન્ડે

Ingredients - સામગ્રી
1 લિટર દૂધ
150 ગ્રામ ખાંડ (અાશરે)
250 ગ્રામ ક્રીમ
7 અંજીર
1 ટેબલસ્પૂન મિલ્ક પાઉડર
વેનિલા એસેન્સ, બદામ, પિસ્તાં

Method - રીત
એક વાસણમાં દૂધમાં ખાંડ અને અંજીરના ઝીણા કટકા નાંખી ઉકળવા મૂકવું. અંજીરના કટકા નરમ થાય અને દૂધ જાડું થાય એટલે ઉતારી લેવું. ઠંડું થાય એટલે તેમાં મિલ્ક પાઉડર, ક્રીમ અને એસેન્સ નાખી મિક્સરમાં બીટ કરી લેવું. પછી એલ્યુમિનિયમના ડબ્બામાં ભરી રેફ્રિજરેટરમાં સેટ થવા મૂકવો. જામી જાય એટલે કાઢી ફરી મિક્સરમાં એકરસ કરવું. જેથી બરફની કણી ભાંગી જાય, પછી ડબ્બામાં ભરી ઉપર છોલેલી બદામ-પિસ્તાંની કતરીથી સજાવટ કરી ફરી ફ્રીઝરમાં મૂકવો. બરાબર જામી જાય એટલે કાઢી લેવો.નોંધ – આવી રીતે ખજૂરનો આઈસક્રીમ બનાવી શકાય.

ત્રિરંગી કોપરાપાક

સામગ્રી :
250 ગ્રામ નાળિયેરનું ખમણ
2 ટેબલસ્પૂન ઘી
450 ગ્રામ ખાંડ
2 ટેબલસ્પૂન દૂધ
250 ગ્રામ માવો
બદામ, ચારોળી, એલચી, જાયફળ, કેસર, લીલો રંગ વગેરે.

રીત :
નાળિયેરને ખમણીથી ખમણી તેનું ખમણ કરવું. તેને ઘીમાં સાધારણ સાંતળવું. વધારે સાંતળવું નહિ. એક વાસણમાં ખાંડ લઈ, તે ડૂબે તેટલું પાણી નાંખી, ઉકાળવું. પછી દૂધ-પાણી નાંખી મેલ કાઢવો. ચાસણી એકતારી થાય એટલે તેને ત્રણ વાસણમાં સરખે ભાગે કાઢી લેવી. એક ભાગમાં કેસરને ગરમ કરી, વાટી, દૂધમાં ઘૂંટી અંદર નાંખવું. કેસરને બદલે કેસરી મીઠો રંગ નાંખી શકાય. બીજા ભાગમાં થોડોક લીલો મીઠો રંગ નાંખવો અને ત્રીજો ભાગ સફેદ રાખવો. પછી ખમણ અને માવાને ભેગાં કરી, તેને ત્રણ સરખા ભાગે, ત્રણે વાસણમાં નાંખવાં. દરેક મિશ્રણને તાપ ઉપર મૂકી કઠણ કરવું. તેમાં એલચી-જાયફળનો ભૂકો નાંખવો. ઠરી જાય તેવું થાય એટલે થાળીમાં ઘી લગાડી, લીલા રંગનું મિશ્રણ પ્રથમ ઠારવું. તે સાધારણ ઠરવા આવે એટલે તેના ઉપર સફેદ મિશ્રણ ઠારવું. તેના ઉપર કેસરી મિશ્રણ ઠારવું. ઉપર છોલેલી બદામની કાતરી અને ચારોળી ભભરાવી દેવી. આ કોપરાપાકને ધ્વજ આકારે ગોઠવવાથી સુંદર લાગશે.

ફાફડા

સામગ્રી :
500 ગ્રામ ચણાની દાળ
100 ગ્રામ અડદની દાળ
મીઠું, સંચળ, તેલ, મરચું, હળદર, ચપટી સોડા.

રીત :
ચણાની દાળ અને અડદની દાળ ભેગી કરી ઝીણો લોટ દળાવવો. પાણીમાં મીઠું અને સોડા નાંખી ઉકાળવું. લોટમાં થોડી હળદર નાંખી, તૈયાર કરેલા પાણીથી કઠણ લોટ બાંધવો. ખૂબ ખાંડી, પછી ગુલ્લાં પાડી, મોટી પાતળી પૂરી વણવી. થોડી વાર છૂટી નાંખી રાખવી. પછી તેમાં ત્રણ કાપા પાડી, તેલમાં ફાફડા તળવા. તળેલા ફાફડા ઉપર સંચળ અને મરચાંની ભૂકી છાંટવી. શક્કરપારા જેમ ચોરસ કાપીને ફાફડા તળી શકાય

ગાંઠિયા

ગાંઠિયા

સામગ્રી :
25 ગ્રામ સાજીખાર
500 ગ્રામ ચણાનો લોટ (બેસન)
100 ગ્રામ તેલ મોણ માટે
1 ટીસ્પૂન મીઠું
થોડો અજમો, તળવા માટે તેલ

રીત :
આશરે ત્રણ કપ પાણીમાં સાજીખાર નાંખી, ઉકાળવું. બે કપ પાણી રહે એટલે ઉતારી, ઠરવા દેવું. ચણાના લોટમાં મીઠું, અધકચરો ખાંડેલો અજમો અને તેલનું મોણ નાંખવું. પછી સાજીખારનું નીતર્યું પાણી લઈ કઠણ લોટ બાંધવો. તેલનો હાથ લઈ, પાટલી ઉપર તેલ લગાડી, હાથથી વળ દઈને ગાંઠિયા બનાવી, તેલમાં તળી લેવા અથવા ગાંઠિયાના મોટા કાણાના ઝારાથી ગાંઠિયા પાડી, તેલમાં તળી લેવા.

ડ્રાય ભાખરવડી

ડ્રાય ભાખરવડી

સામગ્રી :
(પડ માટે)
400 ગ્રામ ચણાનો લોટ,
100 ગ્રામ ઘઉંનો લોટ,
મીઠું, મરચું, હળદર, તેલ – પ્રમાણસર.
(ફિલિંગ માટે)
200 ગ્રામ ચણાનો લોટ,
100 ગ્રામ ચણાની ઝીણી સેવ
25 ગ્રામ સૂકું કોપરું,
1 ટેબલસ્પૂન તલ,
1 ટેબલસ્પૂન ખસખસ,
1 ટેબલસ્પૂન ગરમ મસાલો,
1 ટીસ્પૂન ધાણાજીરું મીઠું, મરચું, ખાંડ, આમચૂર.

ચટણી : 50 ગ્રામ શિંગદાણા, 10 કળી લસણ, 1 ચમચો લાલ મરચું, મીઠું અને ગોળ નાંખી વાટી, ચટણી બનાવવી. વાટતી વખતે થોડું પાણી નાંખી રસાદાર (ચોપડાય તેવી) બનાવવી.

રીત :
ચણાનો અને ઘઉંનો લોટ ભેગો કરી, તેમાં મીઠું, થોડીક હળદર અને તેલનું મોણ નાંખી, કઠણ કણક બાંધી, કેળવી તૈયાર કરવી. ચણાના લોટમાં મીઠું, મરચું અને તેલનું મોણ નાંખી, ખીરું બાંધવું. પેણીમાં તેલ મૂકી, ભજિયાં તળી લેવાં. ઠંડા પડે એટલે ખાંડી, ચાળી, રવાદારા ભૂકો બનાવવો. તેમાં ચણાની સેવ નાંખવી. સૂકા કોપરાને છીણી, શેકી, ઠંડુ પડે એટલે હાથથી મસળી, ભૂકો કરી અંદર નાંખવું. પછી શેકેલા તલ, શેકેલી ખસખસ, મીઠું, ગરમ મસાલો, ધાણાજીરું, ખાંડ અને આમચૂર નાંખીને ફિલિંગ માટે મસાલો તૈયાર કરવો. કણકમાંથી પાતળો, મોટો રોટલો વણી, તેના ઉપર ચટણી લગાડી મસાલો પાથરવો. પછી તેનો સખત વીંટો વાળી કટકા કરવા. કટકાને હાથથી બરાબર દબાવી, તેલમાં તળવા.

ડ્રાયફ્રુટ બરફી

ડ્રાયફ્રુટ બરફી

સામગ્રી :
1 કપ માવો
1 કપ ખાંડ
1/2 કપ પનીર
2 ટેબલસ્પૂન મિલ્ક પાઉડર
1 ટેબલસ્પૂન પિસ્તાનો ભૂકો
1 ટેબલસ્પૂન ચારોળીનો ભૂકો
1/2 ટેબલસ્પૂન એલચીનો ભૂકો
ઘી, એલચીના દાણા

રીત :
દૂધને ગરમ કરી, ઊકળે એટલે ધીમે ધીમે લીંબુનો રસ નાંખી, ઉતારી, હલાવ્યા કરવું. બરાબર ફાટી જાય એટલે કપડામાં બાંધી રાખવું. પછી ઉપર વજન મૂકી, બધું જ પાણી કાઢી નાંખવું. આવી રીતે પનીર બનાવી, વાટી નાંખવું. હવે એક વાસણમાં એક ચમચી ઘી નાંખી, ગરમ થાય એટલે તેમાં થોડા એલચીના દાણા નાંખી, તેમાં માવો, પનીર અને ખાંડ બધું ભેગું કરી નાંખવું. ખાંડ ઓગળે અને મિક્સ થઈ જાય એટલે ઉતારી તેમાં મિલ્ક પાઉડર, બદામ-પિસ્તાં-ચારોળીનો ભૂકો અને એલચીનો ભૂકો નાંખી, થાળીમાં ઘી લગાડી, બરફી ઠારી દેવી. ઠરે એટલે કટકા કાપવા.

[3] દૂધીનો હલવો

સામગ્રી :
500 ગ્રામ દૂધી-કુમળી
2 ટેબલસ્પૂન ઘી
300 ગ્રામ ખાંડ,
300 ગ્રામ માવો (મોળો)
1/2 લિટર દૂધ,
2 ટેબલસ્પૂન છોલેલી બદામની કાતરી
2 ટેબલસ્પૂન પિસ્તાંની કાતરી
થોડા દાણા એલચી,
લીલો મીઠો રંગ, વેનીલા એસેન્સ.

રીત :
દૂધીને છોલી, છીણી નાંખવી. એક વાસણમાં ઘી ગરમ કરી તેમાં થોડા એલચીના દાણા નાંખી, છીણ વઘારવું. થોડી વાર હલાવી તેમાં દૂધ નાંખવું. તાપ ધીમો રાખવો દૂધ બળે અને છીણ બફાય એટલે તેમાં ખાંડ નાંખવી. ખાંડનું પાણી બળે અને લોચા જેવું થાય એટલે લીલો રંગ અને એક ચમચો ઘી નાંખવું. બરાબર ઘટ્ટ અને ઠરે તેવું થાય એટલે ઉતારી, માવાને છીણીને નાંખવો. માવો બરાબર મિક્સ કરી ફરી થોડી વાર તાપ ઉપર મૂકવું. તેમાં બદામ-પિસ્તાની કતરી નાંખવી. માવો બરાબર મિક્સ થઈ જાય એટલે ઉતારી, થાળીને ઘી લગાડી હલવો ઠારી દેવો. બીજે દિવસે હલવો બરાબર ઠરે એટલે ચકતાં પાડવાં.

મેસૂર

મેસૂર

સામગ્રી :
1 કપ ખાંડ
1 કપ ચણાનો લોટ
3 કપ ઘી
2 ટેબલસ્પૂન દૂધ, 5 નંગ એલચી.

રીત :
એક વાસણમાં ખાંડ લઈ, તે ડૂબે તેટલું પાણી નાંખી, તાપ ઉપર મૂકવું. ઊકળે એટલે તેમાં 1 ચમચો દૂધ અને 1 ચમચો પાણી ભેગાં કરી નાંખીને મેલ કાઢવો. ચાસણી એકતારી થાય એટલે ધીમા તાપ ઉપર ગરમ રાખવી. હવે ચણાના લોટને ઘીમાં બદામી રંગનો શેકવો. શેકાય એટલે તેમાં ચાસણી નાંખી 1 ચમચો દૂધ છાંટવું. ખૂબ હલાવતાં રહેવું. પછી ઘીને સારું ગરમ કરી, તેની ધાર કરવી. લોટ છૂટો પડવા આવે, ઘી છૂટું પડે અને ઊભરો આવે એટલે એલચીનો ભૂકો નાંખી, તરત જ સ્ટીલની ચાળણીમાં મેસૂર ઠારી દેવો. ચાળણી તપેલી ઉપર મૂકવી, જેથી ઘી તેમાં નીતરી મેસૂરનો સરસ જાળી પડશે. કટકા પાડવા આંકા કરી રાખવા. સખત થયા પછી એકસરખા કટકા પડશે નહિ.