ક્વીક ઢોકળા

સામગ્રી :-
૬ કપ ચણાનો લોટ, ૨ કપ ખાટું દહીં અથવા છાશ,
૧ કપ બારીક સમારેલી કોથમીર, ૬ ચમચી ઇનો,
૨ ચમચા પીસેલા આદુ-મરચાં
પ્રમાણસર મીઠું, ૨ ચમચા તેલ,
૧/૨ હળદર.
વઘાર માટે :-
૬ ચમચા તેલ, ૪ બોરિયા મરચાં,
રાઈ, હિંગ, તલ ઉપર છાંટવા માટે,
૧/૨ નાળિયેરનું ખમણ, કોથમીર.
રીત :-
ચણાના લોટમાં વલોવેલું દહીં, નવસેકું પાણી અને ગરમ તેલ નાખી ઢોકળા જેવું ખીરું તૈયાર કરવું. ખીરામાં આદુ-મરચાં, મીઠું, હળદર અને કોથમીર નાખી હલાવવું. ખીરાંનાં ૩ સરખા ભાગ કરવા. એક ભાગમાં ૨ ચમચી ઇનોઝ ફ્રૂટ સોલ્ટ નાંખી ચમચાથી ખૂબ ફીણવું કૂકરનાં ડબ્બામાં મિશ્રણ પાથરી ઉકળતા પાણીમાં ૨૦ મિનિટ ઢોકળા બાફી લેવા એવી જ રીતે બીજી બે ભાગનાં ઢોકળાં બાફવાં. ઇનોઝ ફ્રૂટ સોલ્ટ નાખ્યા પછી દરેક ભાગ તરત જ બાફવા મૂકવો.
ઠંડા થયા પછી કાપા પાડી છૂટા કરવા, તેલ ગરમ કરી તેમાં વઘારની ચીજો નાખી વઘારવા, કોપરા અને કોથમીરનું ખમણ છાંટી સર્વ કરવા.