ગળી બુંદી

સામગ્રી :-
100 ગ્રામ ચણાનો ઝીણો લોટ ( 1 કપ લોટ)
2 ટેબલ સ્પૂન ચણાનો જાડો લોટ
150 ગ્રામ ઘી
200 ગ્રામ ખાંડ (1 કપ ખાંડ)
કેસરી કલર અને કેસર
1 ટી સ્પૂન ઇલાયચીનો ભૂકો
દ્રાક્ષ
રીત :-
• 1 કપ ચણાના ઝીણા લોટમાં ૨ ટેબલ સ્પૂન જાડો લોટ, 1 ટી સ્પૂન ઘી નાખવું. બુંદી પાડતાં થોડી વાર પહેલાં લોટ પલાળવો.
• ખીરું એવું રાખવું કે ઝારામાંથી તરત નીચે ગોળ પડે. જાડું ખીરું હો તો પાણી નાખવું. પાતળું હોય તો લોટ નાખવો.
• ઝારો ઘીની તાવડીથી ઊંચો રાખવો. ઘી બરાબર ગરમ થાય એટલે બુંદી પાડવી.ઝારો હલવો ન જોઈએ. ઝારા પર ચમચાથી ધાર કરવી. ચમચો ઝારા પર ઘસવો નહીં.
• એક વખત બુંદી પાડયા પછી ઝારો સાફ કરશો,તો જ ફરીથી સારી બુંદી પડશે.
• ખાંડ ડૂબે એટલું પાણી લઈ ચાસણી કરવી. ઠોર કરતાં થોડી પાતળી બે તારની ચાસણી કરવી. ટપકું મૂકીને અને સહેજ ખસે એટલે ચાસણી થઈ ગઈ કહેવાય.
• ચાસણીમાં કેસરી કલર, કેસર નાખવીં, ઇલાયચીનો ભૂકો નાખવો.ચાસણીમાં દ્રાક્ષ પણ નખાય. ચાસણી થઈ જાય એટલે નીચે ઉતારી લેવી.
• ચાસણી ઠંડી થાય ત્યારે સહેજ ગરમ કરવા મૂકવી. બુંદી તળીને ચાસણીમાં નાખવી. બે-ત્રણ ઘાણ બુંદી ભેગી થાય એટલે કાઢી લેવી.
• બુંદી બહુ ગળી થઈ જતી હોય તો એક ઘાણ થાય એટલી જ વાર રાખીને કાઢી લેવી. બુંદીવાળી થાળી ત્રાંસી રાખવી, જેથી વધારાની ચાસણી નીકળી જાય.
• બુંદી હલાવતા જવું, જેથી બુંદી છૂટી થશે. તેને ખુલ્લી રાખી છાપું ઢાંકવું. ચાસણીમાંથી કાઢી તરત લાડવા પણ વાળી શકાય.